கடலூரில் திருக்குறள் நூல் வழங்கும் விழா தொகுப்பு

திருக்குறள் நூல் வழங்கும் விழா கடலூரில் 10-11-2011 அன்று பிற்பகல் 0330 மணி முதல் 0430 மணி வரை திட்டமிட்டபடி வெகு சிறப்பாக நடந்து முடிந்தது. இவ்விழாப் பற்றியத் தொகுப்பினை, பல்வேறு நாளிதழ்களிலும் இணையத்திலும் வெளிவந்தவற்றை இங்கு தொகுத்துள்ளோம்.

இத்திட்டமானது, தமிழக அரசுப் பள்ளிக் குழந்தைகள் அனைவரும் பயனுறும் விதமாக அனைத்து மாவட்டங்களிலும் செயல்படுத்தப்படவிருக்கின்றது. இம்மாபெரும் திட்டத்தினை செயல்படுத்திட பெரும் பொருளுதவித் தேவைப்படுகின்றது.

அன்பர்கள் இயன்ற அளவில் பொருளுதவி அளித்து இத்திட்டம் வெற்றிபெறவும் தமிழகக் குழதைகள் ப்யனுறவும் குறள்நெறி பரவிடவும் உதவிட வேண்டுகிறோம்.

இத்திட்டம் குறித்து அறிய கீழ்க்கண்ட தொடர்புகளின் வழி அணுகவும்.

நன்றி.
பொங்குதமிழ் மன்றம்
குவைத்

00965-66852906
ponguthamizh@gmail.com

செய்தித்தொகுப்பு

மு.இளங்கோவன் வலைப்பூ: http://muelangovan.blogspot.com/2011/11/blog-post_10.html

தட்சு தமிழ் இணையம்: http://tamil.oneindia.in/art-culture/essays/2011/11-thirukural-books-distributed-school-students-aid0091.html

தினமணி: http://dinamani.com/edition/Story.aspx?SectionName=Edition-Chennai&artid=505141&SectionID=135&MainSectionID=135&SEO=&Title=%E0%AE%AE%E0%AE%BE%E0%AE%A3%E0%AE%B5%E0%AE%B0%E0%AF%8D%E0%AE%95%E0%AE%B3%E0%AF%81%E0%AE%95%E0%AF%8D%E0%AE%95%E0%AF%81%20%E0%AE%87%E0%AE%B2%E0%AE%B5%E0%AE%9A%20%E0%AE%A4%E0%AE%BF%E0%AE%B0%E0%AF%81%E0%AE%95%E0%AF%8D%E0%AE%95%E0%AF%81%E0%AE%B1%E0%AE%B3%E0%AF%8D%20%E0%AE%A8%E0%AF%82%E0%AE%B2%E0%AF%8D%E0%AE%95%E0%AE%B3%E0%AF%8D


தினத்தந்தி:

நெருடல் இணையம்: http://nerudal.com/nerudal.36755.html

நூல் உலகம்: http://www.noolulagam.com/2011/11/09/2967/

http://eutamilar.eu/tamil/index.php/756-q-q

http://cuddalore-news.blogspot.com/2011/11/blog-post_6477.html

புகைப்படத்தொகுப்பு

திருக்குறள் நூல் வழங்கும் விழா

திருவள்ளுவர் ஆண்டு 2042, மடங்கல் 01 வியாழன் மாலை [ 18 -08 -2011]

திருக்குறள் வகுப்பு

வணக்கம்..! பெண்கள் மென்மையானவர்கள்..சிறியத் துன்பத்தையும் தாங்க முடியாதவர்கள்..என்பது ஆண்களின் தவறான நினைப்பு..! ஏன் சிலப் பெண்களும் அப்படித்தான் எண்ணிக்கொண்டிருக்கிறார்கள்.! அதனால்தான் திருமணம் நடக்கும்போது பெண்ணைப்பெற்றவர்கள் மாப்பிள்ளையிடம் என் பெண்ணை கண்கலங்காமல் பார்த்துக் கொள்ளவேண்டும் என்று வேண்டிக்கொள்கிறார்கள் ! ஆனால் உண்மை அதுவல்ல. வாழ்க்கையின் அனைத்து நிலையிலும் பெண்கள் உறுதியான மனநிலையில்தான் துயரங்களையும் துன்பங்களையும் எதிர்கொள்கிறார்கள்..! எடுத்துசொல்ல வேண்டுமெனில்  தமிழீழப்போரில் பெண் போராளிகள் அணிஅணியாக பங்கெடுத்துக் கொண்டதை நாம் அனைவருமே கனத்த மனத்தோடு கவனித்துக் கொண்டுதானே இருந்தோம்...! ஆகவேதான் இந்தவார அதிகாரமான இடுக்கண் அழியாமைக்கு   திருமதி.பாரதி தமிழ்நாடனை ஆசிரியையாக வகுப்புத் தேர்ந்தெடுத்துக் கொண்டது சாலப்பொருந்தியது..!

திரு.இராமன்பொன்னி அவர்களின் இல்லத்தில் வகுப்பு எப்போதும்போல் மாலை ஏழுமணிஅளவில் இனிமையாகத் துவங்கியது.! இடுக்கண் வருங்கால் நகுக என்னும் முதல் குறள் எல்லோரும் அறிந்த குறளாக இருப்பினும் உணர்ந்த குறளாக இல்லை என்பதற்கு பெருகிவரும் தற்கொலை முடிவுகளே சான்றுகள்..! எனவேதான்  தாயுள்ளத்தோடு சாலப்பரிந்து பிள்ளைகளிடம் இருந்தே படிப்பினையைத் தொடங்க வேண்டும் என்றார் நம் ஆசிரியை..!

அடுத்த இரண்டு குறள்களிலும் துன்பத்தைக்கண்டு துவளாதவர்களை குறிப்பிடும் வள்ளுவரைப் பாராட்டி வகுப்பைத் தொடர்ந்தார் ஆசிரியை..! மஞ்சுவிரட்டில் எதிர்த்து வருவோரையெல்லாம் கண்டு சிறிதும் பின்வாங்காமல் பகடு (காளை) முன்னேறுவதில் மட்டுமே குறியாக இருப்பதை ஆசிரியை வள்ளுவக் கருத்தோடு ஒட்டி விளக்கியது நான்காம் குறளுக்கு நயம் சேர்த்தது.! பிள்ளைகளிடம் வெற்றியின் இனிப்பை மட்டுமே ஊட்டி வளர்க்காமல் தோல்வியின் துவர்ப்பையும் சுவைக்க பழக்கவேண்டும் என்று ஆசிரியை ஆழ்ந்து கூறி  இன்றைய போட்டியும் பொறாமையும் நிறைந்த பெற்றோர்களின் தலையில் நங்கென்று ஒரு குட்டு குட்டினார்..!

சிலந்தி- வலை- சிந்தனை பழையதே என்றாலும்
சிக்கல் வரும்போது யாரும் சீர்தூக்கிப் பார்ப்பது இல்லையே..! அதனால்தான் ஆசிரியை ஐந்தாம் குறளுக்கு அதை மீண்டும் அடிக்கோடு இட்டுக் காட்டினார் ! போதும் என்ற மனம் உள்ளவர்கள் செல்வம் வரும்போதும் போகும்போதும் ஒரே மனநிலையில்தான் இருப்பார்கள் என்று ஆறாம் ஆறாம் குறளை விளக்கிய ஆசிரியை, அனுபவம் உள்ளவர்களும் மூத்தோர்களும் உடம்பிற்கு நோய் வரும்போது அதைக் கண்டு அஞ்சாமல் பக்குவமாக அந்த நோயை விரட்டும் வழியை கண்டடைவார்கள் என்று அடுத்தவந்த குறளுக்கும் பொருள்கூறி வகுப்பை தொய்வின்றித் தொடர்ந்தார் ஆசிரியை.!

இன்பமும் துன்பமும் இணைந்ததே வாழ்க்கை என்றும் அதை ஏற்றுக்கொள்வதே வளர்ச்சியின் முதற்படி என்றும் துன்பத்தையும் இன்பமாக நினைத்தால் துன்பம் நம்மைவிட்டு தூரவிலகி போய்விடும் என்றும் தொடர்ந்துவந்த குறள்களுக்கு பொருள் கூறினார் ஆசிரியை..! புடம்போடும்போது தங்கமும் பொலி இடும் போது சிற்பமும் வலித் தாங்குவதால்தான் பொலிவுற  முடிகிறது என இறுதிக் குறளுக்கு எல்லோரும் விளங்கிக்கொள்ளும்படி எடுத்துக்காட்டுக்களோடு பொருள் கூறி இன்னல் வரும்போது இன்முகத்துடன் ஏற்றுக்கொள்பவரை எதிரியும் மதிப்பார் என்று அருமையான விளக்கத்தையும் கூறி வகுப்பை இனிதே நிறைவு செய்தார் ஆசிரியை...!

தொடர்ந்த கருத்தாடலில் பிள்ளைவளர்ப்புப் பற்றி பெரிதும் பேசப்பட்டது..! ஏறு என்ற சொல் காளைக்கும் பொருந்தும். அது வெறும் பெயராக மட்டும் இல்லாமல் அதன் குணத்தையும்  குறிப்பதாக இருப்பது  தமிழ்ச் சொற்களின் சிறப்பிற்கு ஒரு எடுத்துக்காட்டு என்று வகுப்பு தமிழோடு விளையாடி மகிழ்ந்தது..!

தமிழர்கள் இடையில் தமிழ்மொழிப் பற்றிய மதிப்பீடுகள்  குறித்து வகுப்பு வரிந்துகட்டி  வாள் வீசினாலும் புரிந்துகொண்டு கைகோர்த்துக் களித்தது.!
அருமையான இரவு உணவு வழங்கும் உதயம் உணவகத்தை நெஞ்சார வாழ்த்தி இரண்டு பசியும் இனிதே தீர...வகுப்பு கனிந்த மனதுடன் கலைந்தது..!

நன்றி..!                                 முனு. சிவசங்கரன்..!  

திருக்குறள் வகுப்பு..! தி.ஆண்டு 2042, கடகம் 19

வணக்கம்..! இடைவேளையின்றி எப்போதும் இனிய திரைப்படங்களைப் பார்த்துக்கொண்டே இருக்கலாமாம்..! ஒரு முன்னணி காட்சி ஊடகம் கூக்குரலிடுகிறது !
கண்ணீரைக் காசாக்கிப் பெண்ணினத்தை பின்னோக்கி  இழுக்கிறது.. சின்னத்திரை சித்திரங்கள்..! என்ன செய்யலாம் ? சோம்பிக் கிடப்பதற்கு தமிழனுக்குச் சொல்லியா தரவேண்டும் ? அவர்களைத் தூக்கத்திலிருந்து சுருக்கென்று குத்தி எழுப்ப ஒரு சூட்டுக்கோல் வேண்டும்..! அதற்காகத்தான்  இதோ இன்றைய வாரம் நம் வகுப்பாசிரியர் மடியின்மை அதிகாரத்தை நம் மனவெளியில் பதிக்கின்றாரோ..!
திருவள்ளுவர் குடிபெருமை பற்றி இந்த அதிகாரத்தில் மிகுதியாகவே கூறுகின்றார். ஆசிரியர் அதை கருத்துவேற்றுமைக்கு இடமின்றி குடி என்றால் குடும்பம் என்றும் பரம்பரை என்றும் தலைமுறை என்றும் கூறி அமட்டியது குறிப்பிடவேண்டியது.!
விளக்கை வைத்து முதல் குறளை தொடங்கிய வள்ளுவனின்  வாய்மொழியை பின்பற்றி  சுறுசுறுப்புடன் வகுப்பைத் தொடங்கினார் ஆசிரியர். ! ஒரு குடி ஆவதற்கும் அழிவதற்கும் தீய வழிகளில் செல்வதற்கும் சோம்பலே காரணம் என்று அடுத்த வந்த மூன்று குறள்களின் பொருளையும் விளக்கி தனக்கு பிடித்தமானது என்று ஐந்தாவது குறளை கூறினார்.!
அரசரின் துணையே இருந்தாலும் முயற்சி இல்லாதவர் முன்னேற மாட்டார் எனவும் அந்த அரசரும்கூட முயற்சியற்று இருப்பின் அமைச்சர்கள் இடித்துரைக்கும் நிலைக்கு ஆளாவார் எனவும் பகைவர்க்கு அடிமை ஆக நேரிடும் எனவும் தொடர்ந்த குறள்களின் வழியே வள்ளுவரின் கருத்தை வலியுறுத்தினார் ஆசிரியர்..! குடியின் பெருமை குலைந்து போயிருந்தாலும் முயற்சியுள்ள ஒருவர் அக்குடியை நிமிர்ந்தெழ வைத்துவிட முடியும் என்ற கருத்தை ஒன்பதாவது குறள்மூலம் விளக்கிக்கூறினார் ஆசிரியர்..! இறுதியாக மடியில்லாத மன்னவன் இந்தமாநிலம் முழுவதும் ஆளமுடியும் என்று புராண எடுத்துக்காட்டு மூலம் எடுத்துரைத்து வகுப்பை இனிமையாக நிறைவு செய்தார் ஆசிரியர்..!
அன்றைய தினம் ஆசிரியர் தாயகத்துக்கு பயணம் செல்லும் அவசரத்தில் இருந்தார்..! அப்போது பொங்கு தமிழ் மன்றத்தின் சார்பாக வேருக்கு நீர்தேடும் தாய்தமிழ்ப் பள்ளிக்கு உருபாய் ஒரு இலட்சம் காசோலையாக அவரிடம் கொடுத்தனுப்பபட்டது...! ஒரு நெகிழ்வான செய்தி என்னவெனில் சேர்ந்த நன்கொடை ஒரு இலட்சமாக முழுமைபெற பத்தாயிரத்தை மன்றம் சுமை ஏற்றிருந்தது !  அதை தன் தோளில் தாங்கிக்கொண்டார் தமிழ்த்திரு.பாலமுத்துகுமரன் அவர்கள்..!
பிறகு கருத்தாடல்கள் தொடர்ந்தன. "ஓய்வு என்ற ஆடை அழகானது. ஆனால் அதை தொடர்ந்து அணியக் கூடாது.." என்று படித்தக்கருத்தை பதிவுசெய்தார் அருணாமாணிக்கவாசகம் அவர்கள்!
"ஓய்வு என்பதும் சலிப்பென்பதும் தற்கொலைக்கு சமம்" என்ற பெரியாரின் கருத்து  வகுப்பில் வலிமையுடன் பதியப்பட்டது.! சமூகத்தை சீர்கெடுக்கும் தீய பழக்கங்களை ஒழிப்பதில் அரசாங்கத்தின் கடமை பற்றியும் ஊடங்கங்களின் கடமைப் பற்றியும் காரசாரமாக விவாதிக்கப்பட்டது..!  இறுக்கமான இலக்கண விதிகளோடும் எடுத்துக்கொண்ட கருத்தை வழுவாது நின்று வலியுறுத்திக் கூறுவதாலும்தான் திருக்குறள் அதிகாரம் அதிகாரமாக அமைக்கப்பட்டது என அருளாளர் திரு. புருஷோத்தமன் அவர்கள் அதிகாரத்துக்கு பொருள் கூறியது குறிப்பிடத் தகுந்தது..! 
மனிதர்களுக்கு தூக்கம் ஒருநாளைக்கு எத்தனை மணி நேரம் அவசியம் என்பதில் பலவேறு கருத்துக்கள் பரிமாறப்பட்டன ..! இறுதியாக உதயம் வழங்கிய அருமையான இரவு உணவோடு வகுப்பு இனிதே நிறைவெய்தியது..! சூழலின் காரணமாக இன்றைய வகுப்பு தமிழ்த்திரு. இரவி கண்ணன் அவர்கள் வீட்டில் நடத்தப்பட்டது நன்றிக்கு அப்பாற்பட்டது..!   

நன்றி..!                     

                                                                              முனு. சிவசங்கரன் !

தாய்த்தமிழ்ப் பள்ளி நிதியளிப்பு

அன்புடையீர்,

கடந்த 07.07.2011 அன்று நடைபெற்ற, திருக்குறள் வகுப்பு ஓராண்டு நிறைவு நாள் நிகழ்வில், தோழர்.தியாகு அவர்களைத் தாளாளர் ஆகக்கொண்டு நடைபெறும் அம்பத்தூர் தாய்த்தமிழ்ப் பள்ளிக்கு நிதிக்கொடையளிக்க வேண்டினோம். அதற்கிணங்க அன்பர்கள் பலரின் பங்களிப்போடு உரூபாய் ஓரிலக்கம் (ஒரு இலட்சம்) திரட்டப்பட்டது.

இதனை, இன்று (05.08.2011) காலை 1030மணி அளவில், தாயகப்பயணம் மேற்கொண்டுள்ள நமது மன்றத்தின் துணைத்தலைவர் தமிழ்த்திரு. சேதுமாதவன் அவர்கள் தோழர்.தியாகுவினை அவரது சூளைமேடு அலுவலகத்தில் நேரில் கண்டு கையளித்தார். இதனைப் பெற்றுக்கொண்ட தோழர்.தியாகு அவர்கள், கொடையளித்த அனைவருக்கும் தமது நன்றியினையும் பொங்குதமிழ் மன்றத்திற்கும் குவைத் தமிழர்களுக்கும் தமது வாழ்த்தினையும் தெரிவித்தார்கள்.

கொடையாளர்களுக்கு பொங்குதமிழ் மன்றத்தின் சார்பில் மிகுந்த நன்றியினை தெரிவித்துக்கொள்வதோடு, தொடர்ந்தும் இதுபோன்ற பணிகளுக்கு அனைவரும் உதவிடவேண்டி கேட்டுக்கொள்கிறோம்.

திருக்குறள் வகுப்பு, தி.ஆண்டு 2042, கடகம் 12.

திருக்குறள் வகுப்பு !                                                                      நாள்;  தி.வ .ஆண்டு 2042
                                                                                                                 28 -07 -2011
                                       அதிகாரம்: ஊக்கம் உடைமை

திரு. இராமன் அவர்கள் இல்லத்தில் இந்த வாரமும் வகுப்புத் தொடர்ந்து நடந்தது..!
எதுவுமே உழைப்பின்றி இலவசமாய் கிடைக்கவேண்டும் என்ற மாந்த நிலையில் மதி
மயங்கிக் கிடக்கும் மக்களுக்கு தெளிவை உண்டாக்க தேவையொரு மருந்தென்ற
சூழலில் கைகண்ட அமுதமாக இந்த திருவள்ளுவ மாமருந்தான ஊக்கம் உடைமை தக்கதொரு தருணத்தில் வள்ளுவ வகுப்பில் வழங்கப் பட்டது வலிந்து ஏற்கப்பட வேண்டியது..!
ஊக்கம் என்ற சொல்லுக்கு பொருள் என்ன...? ஆசிரியர் வினாவோடு தொடங்கினார் வகுப்பை...! முயற்சி, சோர்வின்மை,விடாமுயற்சி, ஈடுபாடு, தன்னம்பிக்கை, போன்ற பலதரப்பட்ட விடைகள் பகரப்பட்டன..!ஆசிரியர் அனைத்தையும்  அரவணைத்துக் கொண்டு தன் இயல்பில்  வகுப்பைத் தொடர்ந்தார்..! ஊக்கம் என்பதை முதன்மைப் பொருளாகவும் நிலையானதாகவும் முதலிரண்டு குறள்களில் முன்னெழுதித் தந்த வள்ளுவத்தை முகந்தளந்து ஊட்டினார் ஆசிரியர்..! கைப்பொருளை இழந்தாலும் களவாட முடியா மெய்ப்பொருளான ஊக்கம் இருந்தால் போதும் என்ற குறள் மொழி ஆய்ந்து அளிக்கப்பட்டது ! இது வைப்பு நிதி இழந்தாலும் வள்ளுவம் இருந்தால் போதும் என்பதாக இருந்தது! நாக்கில் தேன்தடவி  நான்காம் குறள்வழி நயந்தூட்டும் மருந்தை ஆசிரியர் முரண்நகையோடு எடுத்துக்கூறினார்..! ஆம்.. இன்றைய அரசியல்வாதிகளிடம் நாம் கற்றுக்கொள்ளவேண்டிய ஒன்றே ஒன்று இந்த ஊக்கம்தான் என்றவர் கூறியது இறுக்கமான வகுப்பை இளகவைத்தது...!
அதிகாரத்தின் மையப்பொருளாக ஐந்தாம் குறள் அமைந்திருப்பதை ஆசிரியர் அழகுறக் கூறினார்..!எண்ணுவதெல்லாம் ஏற்றமானதாக இருக்கவேண்டும் என்ற கருத்தமைந்த  ஆறாம் குறளைத் தொடர்ந்து யானை வழி ஏழாவதில் எடுத்துக்கூறிய குறட்கருத்தை 
  வலியுறித்தினார் ஆசிரியர்..!
அடுத்ததில் தலைநிமிர்ந்து செல்லும் தகைமையை ஊக்கம் இல்லாதவர் பெறமுடியாது என்ற வள்ளுவரை வழிமொழிந்தார் ஆசிரியர்..! ஊக்கம் மிகுந்த புலியின்முன் வலிமை இருந்தும் ஊக்கம் குறைந்த யானை அஞ்சும் என்று ஊக்கத்தின் திண்மையை நிலை நிறுத்தும் வள்ளுவரை முன்னிறுத்திய ஆசிரியர் அவர் இறுதிக் குறளில் அறுதியிட்டுக் கூறும் ஊக்கம் உள்ளவரே மனிதர் .. மற்றெல்லோரும் மனித வடிவில் உள்ள மரங்களே
என்றக் கருத்தை பல்வேறு வகையில் ஆசிரியர் உறுதிப்படுத்தி வகுப்பை மிகவும் தெளிவாக நடத்தி முடித்தார்..! அந்த வகையில் அவர் மேற்கத்திய அறிஞர்களின் கருத்துக்களையும் மேற்கோள் காட்டினார்..!   

Phsiological, Safty&Security, Social, Self esteem, Self Achivlisation என்ற ஐந்து படிநிலையில் ஒரு
முக்கோண பரிமாணத்தில் வடிவமைத்து திரு.ஆப்ரஹாம் மாஸ்லோ கூறிய கருத்தை வள்ளுவத்தை நம்மை விடவும் மேல்நாட்டார் எப்படி பின்பற்றுகிறார்கள் பாருங்கள்

என்று ஆசிரியர் காட்சிப்படுத்தினார்..! மேலும் Hersberg, Meclland போன்ற அறிஞர்களும்
நம் திருவள்ளுவரின் சீடர்களாக இருப்பதை ஆசிரியர் ஆய்ந்து கூறியவிதம் அனைவரையும் வியப்பில் ஆழ்த்தியது..!
எப்போதும்போல் வகுப்பு முடிந்ததும் நடக்கும் விவாதங்கள் திசைமாறாமல் ஒருங்கமைக்கும் திரு. தமிழ்நாடன் இன்றும் இப்பணியை செவ்வனே செய்தார்..!
இறுதியாக உதயம் வழங்கிய உணவு விருந்திற்குமுன் திரு. தமிழ்நாடன் அவர்களால் சிறந்ததொரு  திட்டம் முன்வைக்கப்பட்டது..! திருக்குறள் கருத்துக்களை மாணவப் பருவத்திலேயே கடைப்பிடிக்கவேண்டும் என்ற அடிப்படையில் தாயகத்தில் உள்ள எளிமையான அரசுப்பள்ளி மாணவமணிகளுக்கு திருக்குறள் நூலை வழங்கலாம் என்பதே  அது,,! அதற்கான நன்கொடையாக மாதம் ஒரு குவைத் தினாரை ஒவ்வொருவரும் தருவதற்கு இசைந்து அப்போதே இருபது குவைத்தினார் குவிந்தது..! ஆம்..சிறுபொறிதான் தீ...எனப்பரவும்..! 

     நன்றி..!                      

                                                           முனு. சிவசங்கரன்..!      

திருவள்ளுவர் ஆண்டு 2042, கடகம் 05 வியாழன் மாலை [ 21 -07 -2011]

திருக்குறள் வகுப்பு..!

திருவள்ளுவர் ஆண்டு 2042  கடந்தவாரம் வியாழன் அன்று மாலை [ 21 -07 -2011]

திரு. பொன்னிராமன் அவர்கள் இல்லத்தில் பொங்குதமிழ் மன்றத்தின்   சார்பாக               குறள்வகுப்பு  ஆசிரியர் திரு.சேதுமாதவன் அவர்களால் வழக்கம்போல் நடந்தது !  நாட்டின் செயல்திறனற்ற உளவுத்துறையால் நாசவேலைகள் திட்டமிடப்படுவதை அறியமுடியாமல் நாம் பேரிழப்புகளை சந்தித்துக்கொண்டிருக்கும் இவ்வேளையில்  ஒற்றாடல் அதிகாரத்தை ஆசிரியர் எடுத்துக்கொண்டது எதிர்பாராமல் அமைந்த சிறப்பாகும் !
நாட்டின் வளச்சிக்கு ஒற்றாடலின் இன்றியமையாமை , அதை கையாளும் விதம், இல்லையெனில் ஏற்படும் தோல்வி, ஒற்றாடலின் தன்மை, பணியமர்த்தப்படும் ஒற்றர்களின் தரம் என்று முறையே முன் ஐந்து குறள் வழியே வகுக்கப்பட்டதை
ஆசிரியர் தெளிவாய் எடுத்துரைத்தார்..! ஒற்றர்களின் திறன், ஐயமற்றத் தெளிவு,
ஒற்றரையும் ஒற்றரியவேண்டிய அவசியம், ஒரு தகவலை மூவரை வைத்து
தெளிவடைதல் என்ற நான்கு கோட்பாட்டையும் அடுத்து வரும் குறள்களில் பொதிந்திருந்ததை ஆசிரியர் வெளிப்படுத்தி விளக்கியவிதம் எல்லோரும் புரிந்துகொள்ளும்படி இருந்தது.! இறுதியாக ஒற்றர்களுக்கு கொடுக்கப்படும் ஊதியம் எவருமே அறியாவண்ணம் இருக்கவேண்டும் என்று அதிகார இறுதியில் ஆணித்தரமாக கூறப்பட்டுள்ளதையும் விளங்கவைத்து மிக இனிமையுடன் வகுப்பை முடித்துதந்தார் ஆசிரியர்..!
அடுத்தமைந்த நேரங்களில் அறிவார்ந்த அவையாடல்கள் இடம் பெற்றன..! சமூக விழுமியங்களில் ஒன்றான திருமணஉறவு பற்றிய அவையோரின் முரண்பட்ட கருத்தோட்டங்கள் கலகலப்பாக அமைந்தன..! அச்சம், மடம், நாணம், பயிர்ப்பு போன்ற நால்வகை குணங்கள் பெண்ணியல்புக்கு ஏற்றதா...இல்லையா..என்ற பொறிபறக்கும் சூடான கருத்துப்பரிமாற்றங்களும்  அறையின் குளிர்சாதன வசதியைக் குறைத்தன.!
உதயம் உணவகத்தின் இனிய இரவு உணவோடு அன்றைய மாலை மயங்காது தெளிந்து அனைவருக்கும் மன நிறைவைத் தந்தது...! 

                                                                                                                     நன்றி..நன்றி...!

தொகுப்பு: திரு.முனு.சிவசங்கரன்

திருக்குறள் வகுப்பு [ இரண்டாம் ஆண்டின் முதல் வகுப்பு ] தி.ஆண்டு 2042, ஆடவை 29

திருக்குறள் வகுப்பு [ இரண்டாம் ஆண்டின் முதல் வகுப்பு ]                                                          நாள் 14 -07 -2011

                                                                            அதிகாரம்-  கண்ணோட்டம்
வணக்கம்..
குவைத் பொங்குதமிழ் மன்றத்தின் சார்பில் இன்று தமிழ்த்திரு.பொன்னிராமன் அவர்களில்லத்தில் திருக்குறள் வகுப்பு இரண்டாவது அடியை ஏற்றமுடன் எடுத்தடி வைத்தது..! இரண்டாம் வகுப்பு மாணவர்களின் மனநிலையோடு     
இன்றைய மாலை மிக இனிதாக  மலர்ந்தது. ! எதிர்பார்ப்புகளோடு தொடங்கிய வகுப்பு நிறைவாக அமைந்தது.!
அங்கங்கே கொடுங்கோலர்களும் கொடும்போர்ச்சூழலும் மும்பை குண்டு வெடிப்பின் மரண ஓலங்களும்  உலகைப் பதட்டமான நிலையில் வைத்திருக்கும் இக்காலக்கட்டத்தில் கருணை, இரக்கம் என்ற மனிதனின் உயரியப் பண்புகளாக வள்ளுவம் உரக்கப் பேசுவதை இந்த வார படிப்பினையாக நம்  மனதில் நிலை நிறுத்திய வகுப்பாசிரியர் தமிழ்த்திரு. சேதுமாதவன் அவர்களை எவ்வளவுபாராட்டினாலும் தகும்..!
அடுத்து, கடந்த வாரம் நடந்த சிறப்பு விழாவிற்கான வரவு செலவு கணக்கை தமிழ்த்திரு தமிழ்நாடன் அவர்கள்
வகுப்பிற்கு அறியப்படுத்தினார்..! அடுத்து வரும் சிறப்பு விழாக்களுக்கான செலவினை பகுதியாக குறைக்கவேண்டும்
என்ற தமிழ்நாடன் அவர்களின் கருத்து அனைவராலும் ஒப்புநோக்கப்பட்டு ஏற்றுக்கொள்ளப்பட்டது..!
 சிறப்பு விழா பற்றிய அனைவரின் கருத்துக்களும் செவிமடுக்கப்பட்டு விவாதப் பொருளாகி ஆகுபயன்களைப்
ஆராய்ந்து அவை நேரங்கள் அரிய நேரங்களாக பதிவானது !
குவைத்வாழ் தமிழர்களிடையே தனித்திறன் வளர்ச்சிக்காக ஒரு பயிற்சிப் பட்டறை அமைக்கவேண்டும்
என்னும் ஆகச்சிறந்த எண்ணத்திற்கு ஒரு வடிவமைப்பாக தமிழ்நாடன் அவர்களால்  கொண்டுவந்து படிக்கப்பட்ட
செயல் திட்டங்கள் விவாதிக்கப்பட்ட விதம்  வகுப்பினரிடையே உள்ள  கருத்தொற்றுமையை பறைசாற்றியது..!
அதற்கான தொடக்கப் பொறுப்பு தமிழ்த்திரு. முத்து குமரன் அவர்களிடம் ஒப்படைக்கப் பட்ட முடிவு
ஏற்றதொரு செயலுக்கு எரிநட்சத்திரமாக எல்லோர் நெஞ்சிலும் மின்னியது..!
முடிவில் உதயம் பாலு அவர்களின் இரவு உணவின் இன்சுவை விருந்தோடு வகுப்பு இனிதாக நிறைந்தது..!

 குறிப்பு -திருக்குறள் வகுப்பின் ஒருங்கிணைப்பிற்கு திரு முனு. சிவசங்கரன் பணிக்கப்பட்டுளார்.!

தொகுப்பு: திரு.முனு.சிவசங்கரன்

திருக்குறள் வகுப்பு ஓர் ஆண்டு நிறைவும் இரண்டாமாண்டுத் துவக்க விழாவும் தொகுப்புரை

பொங்குதமிழ் மன்றம், குவைத் – திருக்குறள் வகுப்பு

ஓராண்டு நிறைவும் இரண்டாமாண்டு தொடக்கமும்

நாள்: ஆடவைத் திங்கள் 22ஆம் நாள், தி.ஆண்டு 2042 (7.7.2011), வியாழக்கிழமை

பொங்குதமிழ் மன்றத்தின் சார்பில் வாரந்தோறும் நடைபெறும் திருக்குறள் வகுப்பின் ஓராண்டு நிறைவு விழாவும் இரண்டாமாண்டு தொடக்க விழாவும் பாகீல் கோகினூர் உணவகத்தில் நடைபெற்றது.

நிகழ்வின் தொடக்கமாக பாவலர்.முனு.சிவசங்கரன் அவர்கள் வரவேற்புரையாற்றினார்.

தொடர்ந்து, இலங்கைத் தலைநகர் கொழும்புவில் மறைவுற்ற முதுபெரும் தமிழறிஞர் கார்த்திகேசு சிவத்தம்பி அவர்களுக்கு மௌன அஞ்சலி செலுத்தப்பட்டது.

தொடர்ந்து, “குறள் வழிக் காதல் மொழி” என்ற தலைப்பில் திருக்குறள் சிறப்பு வகுப்பினை பொறியாளர் சேதுமாதவன் அவர்கள், படவடிவக் கோப்புகளைக் கொண்டு காணொளிக்காட்சிகள் வழி சிறப்பான முறையில், காதல், பிரிவு, ஊடல், இணக்கம் போன்றக் காட்சிகளைக் கண்முன் நிறுத்தினார்கள். பார்வையாளர்கள் பெரிதும் மகிழ்ந்து பாராட்டினர்.

ஓராண்டாக சிறப்பான முறையில் திருக்குறள் வகுப்பினை நடத்தி வரும் திரு.சேதுமாதவன் அவர்களுக்கு பொறியாளர்கள் முத்துக்குமரன், இலெட்சுமி நாராயணன், முத்துக்குமார் ஆகியோர் நினைவுப் பரிசு வழங்கி பெருமை சேர்த்தனர். திருக்குறள் வகுப்பு நடத்த தமது இல்லத்தில் இடமளித்து பெரிதும் ஆதரவளித்த திரு.இராமன் அவர்களுக்கு பொறியாளர் முத்துக்குமரன், நாகா, முத்துக்குமார் ஆகியோர் நினைவுப்பரிசு வழங்கினர்.

தொடர்ந்து செல்வி. பிரவீணா மகேசுவின் குறளோதல் பார்வையாளர்களை வெகுவாகக் கவர்ந்தது. செல்வி பிரவீணாவுக்கு பொறியாளர் கண்ணன் ரவி அவர்கள் நினைவுப் பரிசு வழங்கினார்கள்.

”குறள் வழி” என்ற விழா சிறப்பு மலரை பொறியாளர் கந்தநாதன் அவர்கள் வெளியிட பொறியாளர் இராசேந்திரன் அவர்கள் பெற்றுக்கொண்டார்கள்.

தொடர்ந்து, திருக்குறள் வகுப்பு ஓராண்டை நிறைவினை ஒட்டி 100 பேருக்கு திருக்குறள் நூல் வழங்கப்பட்டது. இதனை, பொறியாளர் இரமேசு குமார், செல்வம், ஓவியர் கொண்டல் ராசு ஆகியோருக்கு வழங்கி பொங்குதமிழ் மன்றத்தின் தலைவர் முத்துக்குமார் தொடங்கிவைக்க, பார்வையாளர்கள் அனைவருக்கும் வழங்கப்பட்டது.

தோழர்.தியாகு அவர்களால் நட்த்தப்பெறும் தாய்த்தமிழ் தொடக்கப்பள்ளியினை அறிமுகப்படுத்தி தோழர் விண்செண்ட் அவர்கள் உரையாற்றினார். தொடர்ந்து ”வேருக்கு நீர்த்தேடி” என்ற தலைப்பில் தாய்த்தமிழ்ப் பள்ளி குறித்தும் அதன் தேவைகளை வேண்டியும் தோழர் தியாகு உரையாற்றிய ஆவணப்படம் திரையிடப்பட்டது.

பொறியாளர் கண்ணன்ரவி திருக்குறள் வகுப்பு குறித்தான தனது அனுபவங்களையும் கருத்துக்களையும் பகிர்ந்துகொண்ட்தைத் தொடர்ந்து பொறியாளர் நாகா அவர்களும் பொறியாளர் இலெட்சுமிநாராயணன் அவர்களும் வாழ்த்துரை வழங்கினர். இவர்களிருவரும் முறையே உரூபாய் பத்து ஆயிரமும் இருபத்து அய்ந்தாயிரமும் தாய்த்தமிழ்ப் பள்ளிக்கு வழங்கி மகிழ்ந்தனர்.

நிகழ்வின் சிறப்புரையாக பழ.கிருட்டிணமூர்த்தி அவர்கள் ”திருவள்ளுவர் வழி வந்த வள்ளலார்” என்றத் தலைப்பில் சிறப்பானதொரு உரையாற்றினார்கள்.

பழ.கிருட்டிணமூர்த்தி அவர்களுக்கு பொங்குதமிழ் மன்றத்தின் இணைச் செயலாளர் பொறியாளர் இராமன் அவர்கள் நினைவுப் பரிசு வழங்கினார்கள்.

தொடர்ந்து பொறியாளர் கந்தநாதன் அவர்கள் வாழ்த்துரை வழங்கினார்கள். நிகழ்வின் இறுதியாக பொறியாளர் முத்துக்குமரன் அவர்கள் ஆண்டறிக்கையினையும் ஆய்வுரையினையும் வெகுசிறப்பாக வழங்கினார்கள்.

உதயம் உணவகம் உரிமையாளர் தமிழ்த்திரு செயபாலன் அவர்கள், வரும் காலங்களில் திருக்குறள் வகுப்பு நடைபெறும் நாட்களில் கலந்துகொள்ளும் அனைவருக்கும் இரவு உணவு அளிக்க இசைவு தெரிவித்த்தோடு, தாய்த்தமிழ்ப் பள்ளிக்கு உருபாய் அய்ந்தாயிரத்தினையும் வழங்கி மகிழ்ந்தார்.

நிகழ்வின் போது, திருக்குறள் நூல்களின் கண்காட்சியும், பன்னூல் விற்பனையும் நடைபெற்றது.

நிகழ்வினை பாவலர் விருதைபாரி அவர்கள் தொகுத்து வழங்கிட, தமிழ்நாடன் அவர்கள் நன்றியுரையாற்றினார்.

இரவு உணவிற்குப்பின் அனைவரும் பெருமகிழ்வோடு விடைபெற்றனர்.

திருக்குறள் வகுப்பு ஓர் ஆண்டு நிறைவும் இரண்டாமாண்டுத் துவக்க விழாவும்

திருக்குறள் வகுப்பு ஓர் ஆண்டு நிறைவும் இரண்டாமாண்டுத் துவக்க விழாவும்

நாள்: ஆடவை 22ஆம் நாள், (07.07.2011) வியாழக்கிழமை 
நேரம்: மாலை 0600 முதல் 0930 வரை
இடம்: கோகினூர் உணவகம், பாகில்


கண்காட்சி: திருக்குறள் நூல்கள் குறுந்தகடுகள் கண்காட்சி

நிகழ்ச்சி நிரல்:

தமிழ்த் தாய் வாழ்த்து:

வரவேற்புரை: முனு.சிவசங்கரன்

சிறப்புத் திருக்குறள் வகுப்பு: சேதுமாதவன்

சிறப்புரை: தாயகத்திலிருந்து தொலைபேசி வழி திரு. பா.வளன்அரசு.

குறளோதல்: செல்வி ம.பிரவீனா

மலர் வெளியீடு: குறள் வழி தொகுப்பு மலர் 

சிறப்புரை: திருவள்ளுவர் வழி வந்த வள்ளலார் "பழ.கிருட்டிணமூர்த்தி"

100 பேருக்கு திருக்குறள் நூல் வழங்கல்

வாழ்த்துரை: திரு.செந்தமிழரசு

ஆண்டறிக்கை & ஆய்வுரை: முத்துக்குமரன்

திருக்குறள் வகுப்பு குறித்தான கருத்து : வகுப்பில் பங்குகொண்டோர்.

நன்றியுரை

இரவு உணவு 

சிந்துவெளியும் சங்கத்தமிழும் - விழா புகைப்படங்கள்

விரைவில் வெளியிடப்படும்.

சிந்துவெளியும் சங்கத் தமிழும் - விழாத்தொகுப்புரை

விரைவில் வெளியிடப்படும்

சிந்துவெளியும் சங்கத்தமிழும்

தமிழாய்ந்த தலைமகன்கள் கலந்துகொண்டு சிறப்பிக்கவுள்ள இவ்விழாவில் குவைத் வாழ் தமிழர்கள் அனைவரும் கலந்துகொண்டு சிறப்பிக்க வேண்டுகிறோம்.

தமிழ் இணையப் பயிலரங்கம் 01-04-2011

குவைத் பொங்குதமிழ் மன்றத்தின் சார்பில் தமிழ் இணையப் பயிலரங்கம் 01-04-2011 அன்று நடத்தப்பட்டது.

இந்நிகழ்வின் போது, தமிழ் இணையம் குறித்தான அறிமுகம், தமிழ் இணைய வரலாறு, தமிழ் இணைய தளங்கள் வலைப்பூக்கள் குறித்தான அறிமுகம், தமிழ் எழுதிகள், எழுதும் முறை, வலைப்பூ உருவாக்கம் உள்ளிட்டவற்றை திரு.தமிழ்நாடன் அவர்கள் ஒளிபடக்காட்சிகளைக் கொண்டு விளக்கினார்.

நிகழ்வுப்படங்கள்

இவ்வலைப்பூ நிகழ்வின் போது, வலைப்பூ உருவாக்கம் பற்றி செயல்முறை விளக்கமாக உருவாக்கப்பட்டது.